اسلام آباد۔17مئی (اے پی پی):وفاقی وزیر بین الصوبائی رابطہ و منصوبہ بندی احسن اقبال آکھیے جو پاکستانی پوری دنیا اچ ذہانت اتے محنت اچ کہیں توں گھٹ کائنی ، فتح کوں کھیݙ دے میدان اچ نی جتیا ویندا بلکہ آپݨے ذہن اچ جت کوں پاوݨاں پوندے ۔ اے ڳالھ انہاں قومی سپورٹس کانفرنس 2024 دے افتتاحی سیشن توں خطاب اچ آکھی اے ۔ انہاں آکھیے کھیݙاں دی چنڳے ویلھے دے لحاظ نال اڄ دی کانفرنس ٻہوں اہمیت رکھیندی اے ۔ پاکستان اچ کھیݙاریاں دی گیلیکسی موجود اے، اڄ دی کانفرنس دا مقصد کھݙاریاں کوں وݙی سپورٹ ݙیوݨ اے، پاکستانی پوری دنیا اچ ذہانت اتے محنت اچ کہیں توں گھٹ کائنی۔ اولمپکس اچ 25 کروڑ دی آبادی 5 کھیݙاں اچ وی کوالیفائی نی کرسڳی ، افسوس اے پاکستان کھیݙاں دے شعبے اچ تلے آڳئے۔ وفاقی وزیر آکھیے اساکوں پتہ اے جو بھارت کھیݙاں دے شعبے اچ کتھوں کتھاں ترقی کرڳئے لیکن ہݨ دائریں دا سفر ختم کرتے ترقی دا نواں باب رقم کرݨا اے، 2047 اچ ݙو ملکاں آپݨی آزادی دے سو سال دا حساب ݙیوݨا اے ۔ احسن اقبال آکھیے 2028 اولمپکس دی پاکستان کوں ہݨے تیاری شروع کرݨی اے ۔2025 اچ سیف گیمز دی میزبانی کریسوں ، پاکستان کوں پہلی ݙاہ معیشتاں اچ رلݨا اے جیں اچ کھیݙاں دا شعبہ وی شامل اے۔
