اسلام آباد۔20جنوری (اے پی پی) پاکستان اتے روس تجارت، سرمایہ کاری، توانائی، مواصلات، ٹرانسپورٹ، ہائیر ایجوکیشن، انڈسٹری، ریلویز، مالیات، بینکنگ، کسٹمز، زراعت، سائنس تے ٹیکنالوجی اتے انفارمیشن ٹیکنالوجی دے شعبیاں اچ تعلقات ودھاوݨ تے اتفاق کیتے۔ ݙوہیں ملکاں ، کسٹم امور، شہری ہوا بازی اتے کسٹم پروٹوکول دے شعبیاں اچ تعاون دے معاہدیاں تے دستخط کیتن۔ جمعے کوں تجارت، معیشت، سائنس اتے تیکنیکی شعبہ اچ تعاون کیتے قائم پاک روس بین الحکومتی کمیشن دے ترائے ݙینھ دے اجلاس دے چھیکڑ تے جاری سانجھے اعلامیہ اچ ݙسیا ڳیا جو ݙوہیں ملکاں دے مشترکہ کمیشن دا ترائے روزہ اجلاس 18 توں 20 جنوری 2023ء کوں اسلام آباد اچ تھیا۔ مذاکرات اچ روسی وفد دی قیادت وزیر توانائی نیکولائی شلگینوف اتے پاکستان دی قیادت وفاقی وزیر اقتصادی امور سردار ایاز صادق کیتی۔ اجلاس اچ ݙوہیں ملکاں دے سینئر اہلکار وزرا تے سینئر حکام شریک تھیے۔ وزیراعظم شہباز شریف اتے روس دے صدر ولادی میر پیوٹن دی رہنمائی اچ فریقین ہک مضبوط اتے جامع اقتصادی تعلقات کوں ودھاوݨ دا عزم کیتا۔ ݙوہیں فریقاں دا اے موقف ہئی جو پاکستان اتے روس وچال ایجھے تعلقات پاروں ݙوہیں ملکاں دی عوام اتے خطے کوں فائدہ تھیسی۔ سانجھے اعلامیہ اچ ݙسیا ڳیا جو پاک روس بین الحکومت کمیشن دے ستویں اجلاس دی ڳالھ مہاڑ اتے فیصلیاں دے مطابق ݙوہیں ملکاں وچال تعاون دے شعبیاں دا جائزہ ڳھدا ڳے۔ ݙوہیں ملک تجارت، سرمایہ کاری، توانائی، مواصلات، ٹرانسپورٹ، ہائیر ایجوکیشن، انڈسٹری، ریلویز، مالیات، بینکنگ، کسٹمز، زراعت، سائنس تے ٹیکنالوجی اتے انفارمیشن ٹیکنالوجی دے شعبیاں اچ تعلقات کوں ودھاوݨ تے اتفاق کیتا۔ ݙوہیں ملکاں کسٹم امور، شہری ہوا بازی اتے کسٹم پروٹوکول دے شعبیاں اچ تعاون دے ترائے معاہدیاں تے دستخط کیتے۔ کسٹم امور بارے معاہدے تے روس دے محکمہ کسٹم دے نائب سربراہ ولادی میر ایواین اتے ایف بی آر دے ممبر کسٹم مکرم جان انصاری دستخط کیتے۔ کسٹم پروٹوکول اتے ہوا بازی دے شعبہ اچ تعاون دے معاہدیاں تے ڈائریکٹر جنرل ایوی ایشن خاقان مرتصیٰ اتے روسی ایئر ٹرانسپورٹ ایجنسی دے الیگزینڈر دستخط کیتے۔ بعد اچ میڈیا نال ڳالھ مہاڑ کریندیں ہوئیں روسی وفد دے سربراہ نیکولائی شلگینوف آکھیا جو اساں پاکستان نال برآمدات اتے ڈیری دی صنعت اچ تعاون جاری رکھݨ چاہندوں۔
