اسلام آباد – 25 – جون (اي پي پي) وزيراعظم محمد شهباز شريف وفاقي ڪابينا کي آپريشن عزم استحڪام جي حوالي سان اعتماد ۾ وٺندي چيو آهي ته آپريشن عزم استحڪام جو مقصد دهشتگردن جي باقيات، ڏوهن ۽ دهشتگرد ڳٺ جوڙ ۽ ملڪ ۾ پرتشدد انتهاپسندي کي فيصلائتي طور تي پاڙ کان پٽي اڇلائڻ آهي، ننڍي ۽ وچولي پئماني جي صنعت کي ترقي ڏئي ملڪي روانگي واپار ۾ اضافو ڪنداسين، اشرافيه ۽ ملڪي وسيلن جو استحصال ڪندڙن جي مراعتن کي ختم ڪيو ويندو، جڏهن ته وفاقي ڪابينا کنڊ جو اضافي ذخيرو برآمد ڪرڻ، واپار واري وزارت جي سفارش ۽ گڏيل قومن جي افغانستان بابت عالمي غذائي پروگرام جي گذارش تي ٽرڪن جي پرزن تي ٻڌل هڪ ڪنٽينر جي حد تائين ڪراچي کان ڪابل ٽرانزٽ جي اجازت ڏئي ڇڏي آهي، پي آءِ اي جي بڊنگ آگسٽ جي پهرين هفتي ۾ ٿيندي. وزيراعظم آفيس جي ميديا ونگ پاران جاري بيان موجب وزيراعظم محمد شهباز شريف جي صدارت ۾ وفاقي ڪابينا جو اجلاس ٿيو. وزيراعظم ان موقعي تي چيو ته عام ماڻهو جي قابل تجديد شمسي توانائي تائين پهچ يقيني بڻائڻ جي لاءِ سولر پينلز تي ڪنهن به قسم جي نئين ڊيوٽي نه لڳائي ويندي. وزيراعظم چيو ته گهٽ لاڳت قابل تجديد شمسي توانائي هر شهري تائين پهچائينداسين، معيشت کي مثبت رخ تي گامزن ڪرڻ جي لاءِ ڀرپور منصوبابندي ڪري رهيا آهيون، الله جي فضل ۽ ڪرم سان ملڪ معاشي استحڪام طرف تيزي سان وڌي رهيو آهي. وزيراعظم چيو ته ننڍي ۽ وچولي پئماني جي صنعت کي ترقي ڏئي ملڪي روانگي واپار ۾ اضافو ڪنداسين، اشرافيه ۽ ملڪي وسيلن جو استحصال ڪندڙن جي مراعتن کي ختم ڪيو ويندو، عام ماڻهو جي معاشي تحفظ ۽ ان کي هڪ جهڙي ترقي جا موقعا فراهم ڪرڻ حڪومت جي اولين ترجيح آهي. ڪابينا اجلاس ۾ وزيراعظم ويزن عزم استحڪام جي حوالي سان گردش ڪندڙ غلط فهمين ۽ قياس آرائين جي حوالي سان ميمبرن کي اعتماد ۾ وٺندي چيو ته عزم استحڪام هڪ گهڻ رخي، مختلف سيڪيورٽي ادارن جي تعاون ۽ پوري رياستي نظام جو مجموعي قومي ويزن آهي، ان مقصد جي لاءِ ڪنهن نئين ۽ منظم هٿياربند آپريشن بدران اڳ کان جاري انٽيلي جنس جي بنياد تي ڪاررواين کي وڌيڪ تيز ڪيو ويندو. وزيراعظم چيو ته وڏي پئماني تي هٿياربند آپريشن جنهن جي نتيجي ۾ لڏپلاڻ جي ضرورت هجي، ويزن عزم استحڪام تحت اهڙي ڪنهن آپريشن جي شروعات رڳو غلط فهمي آهي، عزم استحڪام جو مقصد دهشتگردن جي باقيات، ڏوهن ۽ دهشتگرد ڳٺ جوڙ ۽ ملڪ ۾ پرتشدد انتهاپسندي کي فيصلائتي طور تي پاڙ کان پٽي اڇلائڻ آهي، بجيٽ 25 – 2024ع تي بحث دوران وزير پارليامينٽ ۾ پنهنجي حاضري يقيني بڻائين. اجلاس کي رياستي ادارن جي نجڪاري خاص طور تي پاڪستان انٽرنيشنل ايئرلائينز جي نجڪاري تي اڳڀرائي کان آگاهه ڪيو ويو. اجلاس کي ٻڌايو ويو ته پي آءِ اي جي نجڪاري جو عمل تيزي سان جاري آهي، پري بڊنگ جي عمل ۾ دلچسپي جو اظهار ڪندڙ ڪمپنيون پي آءِ اي جي مختلف سائٽس جو دورو ڪري رهيون آهن. پي آءِ اي جي بڊنگ آگسٽ جي پهرين هفتي ۾ ٿيندي. وزيراعظم پي آءِ اي جي نجڪاري جي عمل کي تيز ڪرڻ ۽ ان ۾ شفافيت جي عنصر کي اهميت ڏيڻ جي هدايت ڪئي. وفاقي ڪابينا واپار واري وزارت جي سفارش ۽ گڏيل قومن جي افغانستان بابت عالمي غذائي تحفظ جي گذارش تي ٽرڪن جي پرزن تي ٻڌل هڪ ڪنٽينر جي ڪراچي کان ڪابل ٽرانزٽ جي اجازت ڏئي ڇڏي. اها خصوصي اجازت پاڪستان حڪومت پاران رڳو هڪ ڀيرو انساني همدرديءَ جي بنياد تي ڏني وئي آهي. وفاقي ڪابينا مذهبي معاملن ۽ بين المذاهب هم آهنگي ڊويزن جي سفارش تي مذهبي معاملن واري وزارت، پاڪستان حڪومت ۽ اسلامي معاملن، دعوت ۽ رهنمائي واري سعودي عرب جي وزارت جي وچ ۾ مفاهمتي يادداشت تي صحيحون ڪرڻ جي منظوري ڏئي ڇڏي. وفاقي حڪومت رياستي ۽ سرحدي علائقن جي ڊويزن جي سفارش تي ۽ سپريم ڪورٽ جي حڪمن جي روشني ۾ بهاولپور جي امير (مرحوم) جي غيرمنقوله جائيداد جي لاءِ قائم عملدرآمد ڪميٽي جي مدي ۾ مارچ 2025ع تائين توسيع ڏيڻ جي منظوري ڏئي ڇڏي. وفاقي ڪابينا ڪابينا ڊويزن جي سفارش تي فريڪوئنسي ايلوڪيشن بورڊ (ايف اي بي) جي ايگزيڪيوٽو ڊائريڪٽر جي مقرري جي منظوري ڏئي ڇڏي. وفاقي ڪابينا کي اقتصادي رابطا ڪميٽي جي کنڊ جي برآمد جي فيصلي بابت آگاهه ڪيو ويو. اجلاس کي ٻڌايو ويو ته ملڪ ۾ هن وقت کنڊ جا وڏا ذخيرا موجود آهن ۽ ان حوالي سان شگر ايڊوائيزري بورڊ ۽ لاڳاپيل ادارن پيڙهائي جي ايندڙ مُند شروع ٿيڻ کان اڳ جي کپت ۽ اضافي کنڊ جي ذخيرن جو ڪاٿو لڳائي باقي پيل گهٽ مقدار ۾ کنڊ جي برآمد جي منظوري ڏئي ڇڏي. وزيراعظم ان موقعي تي واضح هدايت ڪئي ته کنڊ جي قيمت ۾ ڪنهن به قسم جي اضافي جي قطعي طور تي اجازت نه ڏني ويندي. ان کانسواءِ وزيراعظم ان حوالي سان هڪ ڪابينا ڪميٽي جوڙڻ جي هدايت ڪئي جيڪا کنڊ جي قيمت تي نظر رکندي ۽ جيڪڏهن کنڊ جي قيمت ۾ ڪنهن به قسم جي اضافي جو انديشو ٿيو ته ان جي وڌيڪ برآمد کي روڪيو ويندو. وفاقي ڪابينا ڪابينا ڊويزن جي سفارش تي منصوبابندي ڊويزن واري وزارت جي تيار ڪيل قومي اقتصادي ڪائونسل (اين اي سي) جي سالياني رپورٽ سال 23 – 2022ع کي پارليامينٽ ۾ پيش ڪرڻ جي اجازت ڏيڻ جي منظوري ڏئي ڇڏي. وفاقي ڪابينا اقتصادي رابطا ڪميٽي جي 13 جون 2024ع تي ٿيندڙ اجلاس ۾ ڪيل فيصلن جي توثيق ڪري ڇڏي. وفاقي ڪابينا ليجسٽو ڪيسز بابت ڪابينا ڪميٽي جي 11 جون 2024ع جي اجلاس ۾ ڪيل فيصلن جي پڻ توثيق ڪري ڇڏي. وفاقي ڪابينا سرڪاري ملڪيتي اداري بابت ڪابينا ڪميٽي جي 20 جون 2024ع تي ٿيندڙ اجلاسن ۾ ڪيل فيصلن جي توثيق ڪئي.
.jpg)
