وفاق اتے پنجاب آلی کار ٻیاں صوبائی حکومتاں وی عوام کوں بجلی دے ملھ اچ سوکھ ݙے سڳدن، وزیر اطلاعات عطاء اللہ تارڑ
اسلام آباد۔ 19 اگست(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو بجلی دے بلاں اچ ریلیف، مہانگ ڳھٹاوݨ اتے لوکاں دا جیوݨ سوکھا کرݨ حکومت دی ترجیح اے، وفاق 200 یونٹ تئیں بجلی استعمال کرݨ آلے پروٹیکٹڈ اتے نان پروٹیکٹڈ صارفین کوں ترقیاتی بجٹ اچ کٹوتی کر تے 3 مہینے کیتے 50 ارب روپے دی چھوٹ ݙتی اے، پنجاب حکومت 500 یونٹ بجلی استعمال کرݨ آلے صارفین کوں اپݨے بجٹ اچ45 ارب روپے دا ریلیف ݙتے، وفاق اتے پنجاب آلی کار ٻیاں صوبائی حکومتاں وی عوام کوں بجلی دے ملھ اچ سوکھ ݙے سڳدن۔ اے ڳالھ انہاں میڈیا نال الیندے آکھی۔ انہاں آکھیا جو بجلی دے بلاں اچ ریلیف دے اقدامات تے نویں بحث چھڑ ڳئی اے، مسلم لیگ (ن) دے قائد محمد نواز شریف دی اڳواݨی اچ حکومت دی پہلی ترجیح بجلی دے بلاں اچ ریلیف ݙیوݨ ہا جیندے تے کم شروع تھی چکیے جو لوکاں کوں سوکھ ملے، وفاق اتے پنجاب وعدے دے مطابق صارفین کوں بجلی دے بلاں اچ ریلیف ݙیندی پئی اے، ایویں ہی ساریاں صوبائی حکومتاں کولو عوام کوں ودھ ریلیف ݙیوݨ دا موقع موجود اے، وفاق دی ݙتی گئی سبسڈی پورے ملک کیتے اے، آئی ایم ایف معاہدے سانڳے وفاق لوکاں کوں ہر ممکن سوکھ ݙیسی۔ انہاں آکھیا جو صوبے دا ریلیف ݙیوݨ ایندا اندرونی معاملہ اے، ٻئے صوبے وی چاہون تاں ایویں ریلیف ݙے سڳدن، ایندے تے تنقید دی بجائے ایکوں جی بسم اللہ آکھݨا چاہیدے، حکومت مہانگ ڳھٹاوݨ تے وی کم کریندی پئی اے، پچھلے سال مہانگ 23 فیصد ہئی جیڑھی ہݨ 11 فیصد تے آ گئی اے، ایکوں ٻیا ڳھٹیسوں، بجلی دی تقسیم کار کمپنیاں دی نجکاری سودھا بجلی چوری روکݨ تےکم تھیندا پئے، آئی پی پیز اتے ٻئے معاملات کیتے ٹاسک فورس ٻݨا ݙتی اے جیندی سفارشات تے تیکھے عمل درآمد کرایا ویسی۔(
