واشنگٹن۔19اپریل(اے پی پی):وفاقی وزیرخزانہ ومحصولات محمداورنگزیب آکھیے پاکستان دی معیشت 2047 تئیں ترائے ٹریلین ڈالرتئیں ودھݨ دی صلاحیت رکھیندی اے ، سعودی سرمایہ کاراں سانڳے بینکاری اتے سرمایہ کاری دے قابل منصوبے پیش کریسوں۔ ٹیکسیشن اتے پرائمری بیلنس دے معاملات تے صوبیں دے رلے کم کریندے پیوں ۔ وزیرخزانہ اے ڳالھ گزریل ݙینھ واشنگٹن ڈی سی اچ عالمی بینک اتے بین الاقوامی مالیاتی فنڈ دے موسم بہاردے سالانہ اجلاس دے موقع تےمختلف ملاقاتاں اچ آکھی اے ۔وزیر خزانہ سعودی فنڈ فار ڈویلپمنٹ دے چیف ایگزیکٹوآفیسر سلطان عبدالرحمن المرشد نال ملاقات کیتی ۔ وزیرخزانہ انہاں کوں اڄوکے دورہ سعودی عرب اتے اڄوکے ہفتے پاکستان آوݨ آلے سعودی وفد بارے بریفنگ ݙتی ۔وزیرخزانہ سعودی ڈولپمنٹ فنڈ دے تحت جاری منصوبیں دی پیشرفت تے اطمینان دا اظہار کیتے۔ملاقات اچ کراچی توں چمن تئیں این 25 شاہراہ دی تعمیر اتےدیامیر بھاشا ڈیم فنڈنگ تے ڳالھ مہاڑ کیتی ڳئی ۔ وزیر خزانہ عالمی بینک دے اہتمامنال ’’تیز نتائج اور عظیم تر اثرات کیلئے عمل درآمد ‘‘دے موضوع تےگول میز کانفرنس اچ شرکت کیتی ۔وزیر خزانہ عالمی بینک دی قیادت دی سوچ اتے وژن دی تعریف کیتی۔ وزیرخزانہ عالمی بینک دی اڄوکی رپورٹ دا حوالہ ݙیندے ہوئیں آکھیے جو ایں رپورٹ اچ پاکستان سانڳے 2047 تئیں ھک اعلیٰ درمیانی آمدنی آلا ملک بݨݨ دا ھک واضح روڈ میپ پیش کیتا ڳئے ۔ انہاں آکھیے پاکستان دی معیشت 2047 تئیں300 بلین ڈالر ترائے ٹریلین ڈالر تئیں ودھݨ دی صلاحیت رکھیندی اے ۔
