اسلام آباد۔4دسمبر(اے پی پی) نگران وزیراعظم انوار الحق کاکڑ آکھیے پاکستان تے متحدہ عرب امارات مڈل ایسٹ نارتھ افریقہ ریجن اچ ساریں توں وݙے تجارتی شراکت دار ہن اتے انہاں دی سالانہ اوسط تجارت دا حجم 9 ارب ڈالر اے ، متحدہ عرب امارات دے سرمایہ کار پاکستان اچ سرمایہ کاری دے نویں موقع توں فیدہ چاون ۔ اے ڳالھ انہاں ” گلف ٹو ڈے” کوں انٹرویو ݙیندے ہوئیں آکھی اے ۔ وزیراعظم آکھیے پاکستان اتے متحدہ عرب امارات وچال تکڑے تعلقات دی بنیاد شیخ زید بن سلطان النہیان مرحوم رکھی ہئی تےویلھا گزرݨ دے نال نال اے تعلقات مزید گھاٹے تھیندے ڳئے ۔ انہاں آکھیے متحدہ عرب امارات تے پاکستان دے تعلقات تزویراتی پہلوواں دا احاطہ کیتا ہویا اے ۔ ݙوہیں ملکاں دی قیادت وچال تکڑے رابطے ، ہم آہنگی تے مختلف علاقائی اتے بین الاقوامی معاملات تے ھک ݙوجھے نال نیڑے تعاون موجود اے۔ اساں آپݨٖے انہاں برادرانہ اتے کثیر الجہت تعلقات کوں تجارت ، سرمایہ کاری اتے عوام وچال رابطیں ودھاوݨ دے ذریعے مزید مستحکم بݨاوݨ کیتے ہر ممکن اقدامات کریسن ۔ ݙوہیں ملکاں وچال تجارت دے حوالے نال ھک سوال دے جواب اچ وزیراعظم آکھیے متحدہ عرب امارات مڈل ایسٹ نارتھ افریقہ (مینا) اچ پاکستان دا ساریں توں وݙا تجارتی شراکت دار اے جیں دے نال تجارت دا سالانہ حجم 9 ارب ڈالر اے۔ متحدہ عرب امارات انہاں ملکاں اچ شامل اے جتھاں پاکستان دی برآمدات ساریں توں ودھ ہن ۔ پاکستان اتے متحدہ عرب امارات دی معیشت ݙوطرفہ اے ۔پاکستان متحدہ عرب امارات کوں زرعی مصنوعات، ٹیکسٹائل تے افرادی قوت بھجویندے جݙاں جو متحدہ عرب امارات توں پاکستان پٹرولیم ، پٹروکیمیکل مصنوعات اتے ہائی ٹیک ایکوپمنٹ حاصل کریندے ۔ ݙوہیں ملکاں وچال انفارمیشن ٹیکنالوجی، مصنوعی ذہانت اتے مالیاتی ٹیکنالوجی سودھے مختلف شعبیں اچ تعاون ودھاوݨ دے وسیع مواقع اتے امکانات موجود ہن۔ پاکستان اتے متحدہ عرب امارات وچال 23 ۔ 2022 اچ ݙوطرفہ تجارت دا حجم 9 ارب ڈالر اے جݙاں جو 23 ۔ 2022 اچ متحدہ عرب امارات کیتے پاکستان دی برآمدات 1.4 ارب ڈالر تئیں پڄ چکن جیڑھی جو گزریل پنج سال اچ ساریں تں ودھ ہن ۔ یو اے ای دی پاکستان اچ سرمایہ کاری دے حوالے نال سوال دے جواب اچ وزیراعظم آکھیے پاکستان اچ مختلف شعبیں اچ ٻاہرلی سرمایہ کاری دی حوصلہ افزائی کرݨ حکومت دی اولین ترجیحات اچ شامل اے۔ پاکستان اچ یو اے ای سودھے دنیا دے مختلف ملکاں سانڳے سرمایہ کاری تے اپݨے کاروبار کوں ودھاوݨ دے وسیع موقع موجود ہن تے پاکستان سرمایہ کاری دے ودھارے کیتے سرمایہ کار دوست پالیسیاں اتے جامع فریم ورک بݨائے تے ٻاہرلی سرمایہ کاری دی حوصلہ افزائی کیتی ویندی پئی اے ۔ پاکستان ہر طرح دی سرمایہ کاری دا خیر مقدم کریندے ۔
">
