اسلام آباد۔6ستمبر(اے پی پی) نگران وزیرِ اعظم انوار الحق کاکڑ آکھیے جو خصوصی سرمایہ کاری سہولت کونسل دے پلیٹ فارم توں آئی ٹی شعبے اچ سرمایہ کاری دے ودھارے دے سارے اہداف پورے کیتے ویسن ، ساری جامعات اچ آئی ٹی دے حوالے نال بین الاقوامی معیار دی تعلیم اتے ہنر دی فراہمی یقینی بݨایا ویسی ، حکومت مقامی سطح تے تیار ہائی ٹیک مصنوعات بالخصوص سمارٹ فونز دے ودھارے سانگے ترجیحی بنیاداں تے اقدامات چیسی۔ اے ڳالھ انہاں ٻدھ کوں انفارمیشن ٹیکنالوجی اتے ٹیلی کام شعبے دے حوالے نال منعقدہ جائزہ اجلاس دی صدارت کریندے ہوئیں آکھی اے ۔ اجلاس اچ نگران وفاقی وزیرِ انفارمیشن ٹیکنالوجی ڈاکٹر عمر سیف، مشیرِ وزیرِ اعظم احد خان چیمہ اتے متعلقہ اعلیٰ حکام شرکت کیتی۔ اجلاس اچ وزیراعظم کوں انفارمیشن ٹیکنالوجی تے ٹیلی کام شعبے تے تفصیلی بریفنگ ݙتی ڳئی۔ اجلاس کوں پاکستان دے آئی ٹی شعبے دی ترقی کیتے وزارت دے اقدامات تے ملکی آئی ٹی برآمدات ودھاوݨ کیتے لائحہ عمل پیش کیتا ڳئے۔ اجلاس کوں ݙسایا ڳئے جو وزارت آئی ٹی وفاقی سطح تے سارے سرکاری خدمات کوں ڈیجٹلائز کرتے انہاں کوں ھک چھتری تلے گھن آوݨ کیتے اقدامات کریندی پئی اے ، ایں اقدام توں حکومت کوں ٹیکس دی وصولی دے نظام کوں بہتر بݨاوݨ اچ مدد ملسی تے ٹیکس چوری دی بہتر نشاندہی تھی سڳسی ایں توں علاوہ پاکستان دی معیشت دی مکمل ڈیجیٹلائزیشن دا ہدف وی حاصل کر ڳھدا ویسی۔ اجلاس کوں ݙسایا ڳئے جو پورے ملک اچ جامعات اتے آئی ٹی ماہرین دے تعاون نال ایں شعبے دے زیر تعلیم طلباء تے طالبات کیتے بین الاقوامی معیار دی آئی ٹی تربیت گھنݨ لازمی قرار ݙتی ویسی ایں اقدام توں مزید 2 لکھ ہنر مند لوکاں دا آئی ٹی صنعت اچ ودھارا ممکن تھی سڳسی جیں توں ایں شعبے دی برآمدات اچ 5 ارب ڈالر تئیں ودھارا ممکن تھیسی ۔ فری لانسرز دے حوالے نال وزیرِ اعظم کوں ݙسایا ڳئے جو وزارت فری لانسرز دی تربیت، انہاں سہولتاں تے ٻاہرلے ملک توں رقم دی وصولی سانڳے جامع اقدامات چیندی پئی اے ۔
