اسلام آباد۔13نومبر(اے پی پی) نگران وفاقی وزیر داخلہ سرفراز احمد بگٹی اسلام آباد ٹریفک پولیس کوں دنیا دی بہترین ٹریفک پولیس قرار ݙیندے ہوئیں آکھیے جو قانون دی عملداری اچ کوئی بالا دست کائنی، جیں ݙینھ معاشرے اچ قانون دے سامݨے وی وی آئی اتے عام بندے دی تفریق مک ویسی اساں بحیثیت معاشرہ ٻہوں اڳوں ویسوں ۔او اسلام آباد ٹریفک پولیس ہیڈکوارٹرز دی افتتاحی تقریب توں خطاب کریندے پئے ہن ۔ اسلام آباد کیپٹل سٹی پولیس آفیسر ڈاکٹر اکبر ناصرخان ،چیف ٹریفک آفیسر محمد سرفراز ورگ، ایس پی ٹریفک چوہدری عابد حسین سودھے وفاقی پولیس اتے ٹریفک پولیس دے حکام ایں تقریب اچ شریک ہن ۔ نگران وفاقی وزیر داخلہ سرفراز بگٹی ٹریفک پولیس ہیڈکورٹرز عمارت دا باقاعدہ افتتاح کیتا اتے ٹریفک آفس دے مختلف شعبیں دا دورہ کیتا ۔ تقریب توں خطاب اچ نگران وفاقی وزیر داخلہ سرفراز احمد بگٹی آکھیے ایندے اچ کوئی ݙوجھی ڳالھ کائنی جو اسلام آباد ٹریفک پولیس دا شمار پاکستان دی ہی نی بلکہ دنیا دی بہترین ٹریفک پولیس اچ تھیندے ۔ بطور پارلیمنٹرین ٹریفک قوانین دی خلاف ورزی تے میݙے وی چالان تھئن ، اے حوصلہ افزا ڳالھ اے ، جیں ݙینھ معاشرے اچ قانون دے سامݨے وی آئی پی تے عام بندے دی تفریق مک ویسی اساں بحیثیت معاشرہ اڳوں ویسوں ۔ انہاں آکھیے دھپ، مینھ ،جلسے ، جلوس ہوون یا عید دا موقع ، ٹریفک پولیس آن ڈیوٹی ہوندی اے ، ایہا چیز تساکوں معاشرے توݨ منفرد کریندی اے ۔ اللہ تعالی تساکوں لوکاں دی خدمت دا موقع ݙتے ۔
