کوئٹہ۔23ستمبر (اے پی پی):ڈائریکٹر جنرل پی ڈی ایم اے نصیر احمد ناصر آکھیے جو بلوچستان اچ اڄوکے ساوݨ ویلھے 32 ضلعے ٻہوں متاثر تھئن ،300 توں ودھ اموات جݙاں جو 245 لوکاں دے وارثاں اچ امدادی چیک ݙتے ڳئن ، اے ڳالھ انہاں نصیرآباد اچ میڈیا نال ڳالھ مہاڑ کریندے ہوئیں آکھی اے ۔ڈائریکٹر جنرل پی ڈی ایم آکھیے جو اڄوکے ساوݨ دے مینھ توں بلوچستان دے 32 ضلعے ٻہوں زیادہ متاثر تھئن 300 توں ودھ اموات تھئن پورے صوبے اچ پاکستان دی تاریخ دا ساریں توں وݙا ریلیف اتے ریسکیو آپریشن جاری اے ترائے مہینے توں ودھ بلوچستان دے متاثرہ عوام دی خدمت جاری اے بحالی دا عمل ٻہوں اوکھا اے مگر ساریں کوں پکے عزم نال اڳوں ودھݨا ہوسی پی ڈی ایم اے دی طرفوں نصیرآباد ڈویژن اچ ملیریا ٹمپریچر ٹائیفائڈ گیسٹرو تے جلد دیاں بیماریاں دی دوائیں ݙیوݨ توں بعد متاثرین کوں ریلیف ملسی ۔ ڈی جی پی ڈی ایم اے نصیر احمد ناصر آکھیے جو 13 جون توں شروع تھیوݨ آلے پری ساوݨ دے پہلے اسپیل توں ہݨ تئیں پی ڈی ایم اے مصروف عمل اے ،ایں واری پورے صوبے اچ ہنگامی حالات دی وجہ توں عوام کوں اوکھ تھئی مگر صوبائی حکومت عوام کوں کلھا نی چھوڑیاں پی ڈی ایم اے دی توسط نال حکومت صوبے دے متاثرین اچ خیمے راشن دوائیں دے سلسلے کوں جاری رکھیا ہوئیا اے ۔
