اسلام آباد۔26جولائی (اے پی پی):وزیراعظم عمران خان ساوݨ دی شجر کاری مہم دا آغاز کریندے ہوئیں آکھیے جو سارے پاکستانی ایں مہم اچ بھرپور حصہ گھنن ، ہر پاکستانی گھٹ توں گھٹ ھک درخت لاوے ، شہراں اچ کوئی جاہ خالی نظر نہ آوے ، پاکستان ماحولیاتی تحفظ اتے گلوبل وارمنگ دے منفی اثرات گھٹ کرݨ دے اقدامات اچ لیڈ کریندا پئے ۔ او سنوار کوں ایف نائن پارک اچ موسم ساوݨ دی شجر کاری مہم دی افتتاحی تقریب توں خطاب کریندے پئے ہن ، ایں موقع تے وفاقی وزیر داخلہ شیخ رشید احمد، وفاقی وزیر منصوبہ بندی، ترقی واصلاحات اسد عمر ، وزیر مملکت موسمیاتی تبدیلی زرتاج گل ، پی ٹی آئی دے رہنما سینیٹر فیصل جاوید ، وزیراعظم دے معاون خصوصی قومی صحت ڈاکٹر فیصل سلطان وی موجود ہن۔ وزیراعظم آکھیے جو دنیا اچ وݨاں دی تعداد دے لحاظ نال پاکستان کئی ملکاں توں پچھوں اے ۔ بھارت اساں توں وݨاں دی تعداد دے لحاظ نال اڳوں ھے ۔ ماضی اچ کہیں حکومت ایں تے توجہ نی ݙتی ، ایندے ماحول تے شدید اثرات پوسن ۔ گلوبل وارمنگ عالمی سطح تے ٻہوں اہم مسئلہ بݨ ڳئے ۔ پاکستان کوں ساوا تے سوہݨا بݨاوݨ ، آلودگی مکاوݨ تے ماحول کوں بہتر بݨاوݨ کیتے لاہور ، پشاور اتے کراچی سودھے پورے ملک اچ شجر کاری ٻہوں ضروری اے ۔جنگلات دا رقبہ ودھاوݨ دی لوڑھ اے ، وزیراعظم آکھیے جو اڄ ساوݨ دی شجر کاری مہم شروع کیتی ویندی پئی اے ، سارے پاکستانی ایندے اچ شرکت کرن تے ہر پاکستان گھٹ توں گھٹ ھک ٻوٹا لاوے تے ٻہوں وݙا انقلاب آسڳدے ۔ وزیراعظم ضلعی انتظامیہ دے افسراں کوں ہدایت کیتی جو گھراں ، پارکس سودھے ساریاں خالی جاہواں تے ٻوٹے لاون ۔ شہراں اچ کوئی جاہ خالی نی ہووݨی چاہیدی ۔ وزیراعظم آکھیے جو اساݙا فرض اے جو آندیاں نسلاں کیتے چنڳاں تے بہتر ملک چھوڑ تے ونڄوں ، انہاں آکھیے جو پی ٹی آئی دی حکومت 10 ارب وݨ رہاوݨ دا ہدف مقرر کیتے جیں دی دنیا تعریف کریندی پئی اے ۔ پاکستان گلوبل وارمنگ دے منفی اثرات گھٹ کرݨ دے لحاظ نال دنیا دی قیادت کریندا پئے ۔
