اسلام آباد۔9جون(اے پی پی):قومی اسمبلی اچ آندے مالی سال 2023-24 دا 1450 کھرب دا وفاقی بجٹ پیش کر ݙتا ڳئے ، سرکاری ملازمین دیاں تنخواہواں اچ 30 توں 35 فیصد جݙاں جو پنشنرز دی پنشن اچ 17.5 فیصد ودھارے دی تجویز ݙتی ڳئی اے، سرکاری شعبہ دے ترقیاتی پروگرام دا حجم 1150 ارب روپے رکھیا ڳئے ، ترقی دا ہدف صرف 3.5 فیصد رکھیا ڳئے ، آندے سال افراط زر دی شرح اندازاً 21 فیصد تئیں ہوسی ، بجٹ خسارہ 6.54 فیصد اتے پرائمری سرپلس جی ڈی پی دا 0.4 فیصد ہوسی ، برآمدات دا ہدف 30 ارب ڈالر جݙاں جو ترسیلات زر دا ہدف 33 ارب ڈالر رکھیا ڳئے ، ایف بی آر محاصل دا تخمینہ 9200 ارب روپے ہے جیں اچ صوبیں دا حصہ 5276 ارب روپے ہوسی ، وفاقی نان ٹیکس محصولات 2963 ارب روپے، وفاقی حکومت دی کل آمد 6887 ارب روپے ہوسی، وفاقی حکومت دے کل اخراجات دا تخمینہ 14460 ارب روپے ہے جیں اچ سود دی مد میں ادائیگی تے 7303 ارب روپے خرچ تھیسن ۔ ملکی دفاع کیتے 1804 ارب روپے، سول انتظامیہ دے خرچیں کیتے 714 ارب روپے رکھئے ڳئن ، پنشن دی مد اچ 761 ارب روپے رکھئے ڳئن، بجلی گیس اتے ٻئے شعبہ جات کیتے 1074 ارب روپے دی رقم بطور سبسڈی مختص کیتی ڳئی اے ۔ آزاد کشمیر گلگت بلتستان، خیبرپختونخوا اچ ضم شدہ ضلعیں بی آئی ایس پی، ایچ ای سی، ریلویز اتے ٻئے محکمیں کیتے 1464 ارب روپے دی گرانٹ رکھی ڳئی اے ، مسلم لیگ (ن) دی حکومت ماضی اچ وی ملک کوں اوکھ توں کڈھیا تے ہݨ وی ی اپݨی اتحادی جماعتاں دے نال رل تے ملک کوں ترقی دے رستے تے ٹورݨ کیتے کوشاں اے ، حکومت سیاست نی ریاست بچائو پالیسی تے عمل کیتے، اپݨی سیاسی ساکھ دی قربانی ݙے تے معیشت دی بحالی کوں ترجیح ݙتی۔ جمعہ کوں قومی اسمبلی اچ وفاقی وزیر خزانہ سینیٹر اسحق ڈار آندے مالی سال 2023-24ء دا وفاقی بجٹ پیش کیتا۔ انہاں بجٹ دے آغاز تے 2013ء توں2017ء تئیں دے مسلم لیگ (ن) دے دور حکومت اتے تحریک انصاف دے 2018ء توں 2022ء دے دور دا تقابلی جائزہ پیش کیتا۔ انہاں ݙسایا جو مالی سال 2016-17 اچ وزیراعظم محمد نواز شریف دی قیادت اچ پاکستان دی معیشت دی شرح نمو 6.1 فیصد تے پڄ چکی ہئی ۔ افراط زر دی شرح 4 فیصد جݙاں جو فوڈ انفلیشن اچ سالانہ اوسطاً ودھارا صرف ݙو فیصد ہئی۔ بجلی دے نویں منصوبیں توں ملک اچ بجلی دی لوڈ شیڈنگ ختم کیتی۔ ضرب عضب اتے رد الفساد آپریشنز تے افواج پاکستان دی قربانیاں دی مرہون منت ملک اچ دہشت گردی دے ناسو ر تے قابو پاتا ڳیا ۔ پاکستان اچ امن و امان تے سیاسی استحکام ہئی ، انہاں حالات اچ منتخب جمہوری حکومت دے خلاف سازشاں دے ڄال وچھا ݙتے ڳئے جیں دے نتیجے اچ اگست 2018 اچ ھک سلیکٹڈ حکومت آئی جیں دی معاشی ناکامیاں تے اتنا ہی آکھݨ کافی اے جو ملک 2017ء اچ دنیا دی 24 ویں وݙی معیشت بݨ چکیا ہئی او 2022ء اچ 47 ویں نمبر تے آڳئے ۔ وزیر خزانہ آکھیے ایں ویلھے پاکستان معاشی تاریخ دے اوکھے مرحلے توں گزردا پئے ، ایں معاشی صورتحال دی خرابی دی اصل ذمہ وار پاکستان تحریک انصاف دی سابق حکومت اے۔ موجودہ حالات گزریل حکومت دی معاشی بدانتظامی، بدعنوانی، عناد پسندی اتے اقرباء پروری دا شاخسانہ ہن۔ وزیر خزانہ آکھیے تحریک انصاف حکومت دی غلط معاشی پالیسی دی وجہ توں کرنٹ اکائونٹ خسارہ 17.5 ارب ڈالر توں ودھ ڳئے ، زرمبادلہ دے ذخائر اچ تکھے گھٹکی تھئی ، آئی ایم ایف پروگرام دی تکمیل پاکستان کیتے ٻہوں اہم ہئی لیکن تحریک انصاف دی حکومت ایں نازک صورتحال اچ حالات کوں ڄاݨ ٻجھ تے خراب کیتا، پٹرول تے بجلی دیاں قیمتاں اچ سبسڈی دے ذریعے کمی کرݙتی ، ایجھے اقدامات چاتے جو آئی ایم ایف دیاں شرطاں دی خلاف ورزی ہئی، سابقہ حکومت دے وزیر خزانہ فون کر تے ݙو صوبائی وزرائے خزانہ تے شدید دٻائو پاتا جو او آپݨا قومی فریضہ انجام نہ ݙیندے ہوئیں آئی ایم ایف دے پروگرام کوں سبوتاژ کرن ، اے اقدامات نویں حکومت کیتے بارودی سرنگاں وچھاوݨ دے مترادف ہن جنہاں توں مالی خسارے اچ ودھارا تھئے تے پاکستان اتے آئی ایم ایف دے تعلقات کوں شدید نقصان پڄائے جݙاں جو چور مچاوے شور دے مترادف انہاں سارے حالات دی ذمے واری نویں حکومت تے پاوݨ دی کوشش کیتی ، انہاں کوں یقین ہئی جو معاشی حالات اتنے خراب تھی ویسن جو کوئی پاکستان کوں ڈیفالٹ توں نہ بچا سڳسی اے انتہائی غیر ذمہ دارانہ طرز عمل ہئی ، تاں جو وزیراعظم شہباز شریف اتے اتحادی جماعتاں دے بھرپور تعاون توں ایجھے معاشی فیصلے کیتے ویندے پئن جنہاں دی وجہ توں انہاں ملک دشمن لوکاں دے عزائم پورے نی تھیندے پئے ۔ وزیر خزانہ آکھیے موجودہ اتحادی حکومت اقتدار اچ آندے ہی آئی ایم ایف پروگرام کوں بحال کرݨ دی کوشش کیتی ، حکومت کوں علم ہئی جو پاکستان کوں معاشی بحالی کیتے ٻہوں اوکھے اقدامات چاوݨے پوسن جیں دی وجہ توں عوام کوں مہانگ تے غربت اچ ودھارے دا سامݨا کرݨا پوسی ، روپے دی قدر اچ کمی اتے شرح سود اچ تکھے ودھارے دے نتیجے اچ معاشی مشکلات اچ ودھارا تھئے ، حکومت سیاست نی ریاست بچائو پالیسی تے عمل کیتے، اپݨی سیاسی ساکھ دی قربانی ݙے تے معیشت دی بحالی کوں ترجیح ݙتی ۔ انہاں آکھیے جون 2018ء اچ پاکستان دا سرکاری قرضہ تقریباً 25 ٹریلین روپے ہئی جݙاں جو پی ٹی آئی دی معاشی بد انتظامی اتے بلند ترین بجٹ خساریں دی وجہ توں اے قرض مالی سال 2021-22 تئیں 49 ٹریلین روپے تئیں پڄ چکیا ہئی ، چار سالہ دور اچ اتنا قرض ڳھدا ڳئے جو گزریل 71 سال اچ ڳھدے ڳئے قرض دا 96 فیصد ہئی ۔ انہاں آکھیے موجودہ حکومت بجٹ خسارے کوں گھٹ کرݨ کیتے کفایت شعاری توں کم ڳھدے ، خرچیں اچ کمی کیتی ڳئی جیں پاروں بجٹ خسارہ پچھلے مالی سال اچ جی ڈی پی دا 7.9 فیصد توں گھٹ تے ایں سال 7 فیصد تھی ڳیا ، موجودہ حکومت وزیراعظم شہباز شریف دی دور اندیش قیادت اچ آپݨے سیاسی نقصانات دی پرواہ کیتے بغیر ملک کوں ڈیفالٹ توں بچایا۔ وزیر خزانہ آکھیے 9 مئی کوں تھیوݨ آلے المناک، شرمناک ملک دشمن واقعات اچ سیاسی جماعت دا ویس وٹا تے مسلح دہشت گرد جتھیں پاکستان دی سالمیت، ساکھ اتے قومی وقار کوں مجروح کرݨ دی گھنائونی تے منظم سازش کیتی، پاک فوج دے شہداء دی یادگاراں دی بے حرمتی کیتی ڳئی ، ملک دی تاریخ اچ پہلی واری دفاعی تنصیبات کوں بربریت دا نشانہ بݨایا ڳیا، اینکوں ملک دشمن عناصر کہیں صورت وی نرمی اتے رحم دلی دے حقدار کائنی ، انہاں کوں پاکستان دے قوانین دے مطابق سخت سزاواں ݙیوݨیاں چاہیدن تاں جو اڳوں کوئی ایجھے جرم دا ارتکاب نہ کرے۔ انہاں آکھیے گزریل ھک سال اچ پاکستان کوں سیلاب دی ناگہانی آفت دا سامݨا کرݨا پئے جیں دے نقصانات دا تخمینہ 30 ارب ڈالر تو ودھ اے ۔ انہاں آکھیے گزریل ھک مہینے اچ حکومت ݙو واری پٹرولیم مصنوعات دیاں قیمتاں اچ کمی کیتی، جولائی 2022ء توں ہݨ تئیں حکومت تقریباً 12 ارب ڈالر دے غیر ملکی قرضہ جات دی ادائیگی کر چکی اے، ایندے باوجود ملکی زرمبادلہ دے ذخائر 9 ارب 34 کروڑ ڈالر ہن، موجودہ حکومت زرعی شعبہ تے سیلاب دے تباہ کن اثرات اتے مجموعی مشکلات کوں دور کرݨ کیتے ݙو ہزار ارب روپے توں ودھ کسان پیکج ݙتا جیں دی وجہ توں زرعی شعبہ اچ 1.5 فیصد گروتھ تھئی ، کݨک دی بمبر پیداوار تھئی ، حکومت سیلاب توں متاثرہ علاقیں اچ نویں سروں تعمیر کیتے 578 ارب روپے دے منصوبیں دا آغاز کرݙتے۔ وزیر خزانہ آکھیا جو معیشت اچ بہتری دی سدھ دے باوجود اڄاں وی معیشت کوں چیلنجز دا سامݨا اے، آندے مالی سال کیتے ترقی دا ہدف صرف 3.5 فیصد رکھیا ڳے، زرعی شعبہ دی بہتری کیتے زرعی قرضیاں دی حد کوں 1800 ارب روپے توں ودھ تے 2250 ارب روپے کر ݙتا ڳے۔ آندے مالی سال اچ پںجاہ ہزار زرعی ٹیوب ویلز کوں شمسی توانائی تے کرݨ کیتے 30 ارب رپے رکھیے ڳن۔ ملک اچ معیاری ٻڄاں دے استعمال کوں فروغ ݙیوݨ کیتے سارے درآمدی ٹیکس اتے ڈیوٹیز ختم کیتی ویندی پن، چاول دی پیداوار ودھاوݨ کیتے سیڈر، رائس پلانٹرز اتے ڈرائیرز کوں وی ڈیوٹی اتے ٹیکس توں استثنیٰ دی تجویز اے، وزیراعظم یوتھ بزنس تے ایگریکلچر لون سکیم دے تحت چھوٹے اتے وچلے درجے دے سوکھے قرضیاں تے مارک اپ سبسڈی کیتے ݙاہ ارب روپے رکھیے ویسن۔ درآمدی یوریا تے سبسڈی کیتے چھی ارب روپے رکھیے ڳن۔ انہاں ݙسیا جو آئی ٹی اتے اوندے متعلقہ خدمات دی حوصلہ افزائی کیتے آئی ٹی برآمدات کوں ودھاوݨ کیتے انکم ٹیکس دی 0.25 فیصد رعایتی شرح دی سہولت 30 جون 2026 تئیں جاری رکھی ویسی، فری لانسر کوں گوشواریاں اتے سیلز ٹیکسز رجسٹریشن توں مستثنیٰ قرار ݙتا ڳے، ہک سادہ کاغذ تے انکم ٹیکس ریٹرن دا اجراء کیتا ویندا پے، پںجاہ ہزار سالانہ ڈالر دی بغیر ٹیکس دی سافٹ ویئر اتے ہارڈویئر درآمد کر سڳسوں۔ ٹیکسٹائل انڈسٹری کوں فروغ ݙیوݨ کیتے مقامی سطح تے نہ ٻݨݨ آلے سنتھیٹک فیلمنٹ یارن تے پنج فیصد ریگولیٹری ڈیوٹی ختم کیتی ویندی پی اے۔ انہاں آکھیا جو پاکستان تارکین وطن کیتے ٻاہرلے ملک ترسیلات زر دے ذریعے غیر منقولہ جائیداد تے ݙو فیصد فائنل ٹیکس ختم کیتا ویندا پے۔ انہاں کیتے قرعہ اندازی دے ذریعے وݙے انعامات ݙیوݨ کیتے سکیم دا اجراء کیتا ویندا پے، تعلیم دے شعبے اچ مالی تعاون کیتے پاکستان انڈوومنٹ فنڈ قائم کیتا ڳے جئیں کیتے آندے مالی سال دے بجٹ اچ پںج ارب روپے رکھیے ویندے پن۔ آندے مالی سال کیتے لیپ ٹاپ سکیم کیتے 10 ارب روپے رکھیے ڳن۔ تریمتیں دی خودانحصاری کیتے بجٹ اچ پنج ارب روپے رکھیے ڳن۔ نینگراں کوں اپݨا کاروبار شروع کرݨ کیتے رعایتی شرح تے قرضیاں دی فراہمی کیتے ݙاہ ارب روپے رکھیے ڳن۔ انہاں آکھیا جو ریئل سٹیٹ انویسٹمنٹ ٹرسٹ بارے ٹیکس مراعات کوں 30 جون 2024 تئیں ودھایا ویندا پے، بے نظیر انکم سپورٹ پروگرام دا بجٹ ودھا تے 450 ارب روپے کرݨ دی تجویز اے، بے نظیر تعلیمی وظائف پروگرام دا دائرہ 60 لکھ ٻالاں توں ودھا تے 83 لکھ اتے ایں مقصد کیتے 55 ارب روپے توں ودھ دی رقم رکھی ڳی اے، 92 طالب علماں کوں بے نظیر انڈر گریجوایٹ سکالرشپ کیتے 6 ارب روپے رکھݨ دی تجویز اے۔ یوٹیلٹی سٹورز کارپوریشن تے مستحق لوکاں کوں اٹے، چاول، دالیں، کھنڈ اتے گھیو تے سبسڈی ݙیوݨ کیتے 35 ارب روپے رکھیے ڳن۔ استعمال تھیے کپڑیاں تے لاتا ڳیا ݙاہ فیصد ریگولیٹری ڈیوٹی کوں ختم کیتا ویندا پے۔ وزیرخزانہ ݙسیا جو کوئلے اتے سولر توں بجلی دی پیداوار کوں ودھاوݨ کیتے حکومت پکا ارادہ رکھیندی اے۔ سولر پینل، انورٹر اتے بیٹریزدے خام مال کوں کسٹم ڈیوٹی توں استثنیٰ ݙتا ویندا پے۔ وزیرخزانہ ایں مالی سال 2022-23 دے نظرثانی تھیے بجٹ بارے ݙسیا جو ایں بجٹ اچ ایف بی آر دے محاصل 7200 ارب روپے رہݨ دا امکان اے جئیں اچ صوبیاں دا حصہ 4129 ارب روپے تھیسی، وفاقی حکومت دا نان ٹیکس ریونیو 1618 ارب روپے رہݨ دی توقع اے، وفاق دے محاصل 4689 ارب روپے تھیسن۔ کل خرچیاں دا تخمینہ 11090 ارب روپے اے، سرکاری شعبہ دے ترقیاتی پروگرام دی مد اچ خرچے 567 ارب روپے رہݨ دا امکان اے۔ دفاع تے کم و بیش 1510 ارب روپے خرچ تھیسن۔ سول حکومت دے مجموعی خرچے 535 ارب روپے، پنشن تے 654 ارب روپے، سبسڈیز دی مد اچ 1093 ارب روپے اتے گرانٹس دی مد اچ 1090 ارب روپے خرچ تھیسن۔ آندے مالی سال دے اعدادوشمار پیش کریندیں ہوئیں انہاں ݙسیا جو آندے مالی سال افراط زر دی شرح اندازاً 21 فیصد تئیں ڳھٹ تھیسی، بجٹ خسارہ 6.54 فیصد اتے پرائمری سرپلس جی ڈی پی دا 0.4 فیصد ہوسی۔ برآمدات دا ہدف 30 ارب ڈالر جڈانجو ترسیلات زر دا ہدف 33 ارب ڈالر اے، ایف بی آر محاصل دا تخمینہ 9200 ارب روپے اے جئیں اچ صوبیاں دا حصہ 5276 ارب روپے ہوسی۔ وفاقی نان ٹیکس محصولات 2963 ارب روپے، وفاقی حکومت دی کل آمد 6887 ارب روپے ہوسی۔ وفاقی حکومت دے کل خرچیاں دا تخمینہ 14460 ارب روپے اے جئیں اچ سود دی مد اچ ادائیگی تے 7303 ارب روپے خرچ تھیسن۔ سرکاری شعبہ دے ترقیاتی پروگرام کیتے 950 ارب روپے دا بجٹ رکھیا ڳے ایندے علاوہ پبلک پرائیویٹ پارٹنرشپ کیتے 200 ارب روپے دی ودھیکی رقم دے بعد مجموعی ترقیاتی بجٹ 1150 ارب روپے دی بلند ترین سطح تے ہوسی۔ ملکی دفاع کیتے 1804 ارب روپے، سول انتظامیہ دے خرچیاں کیتے 714 ارب روپے مہیا کیتے ویسن۔ پنشن دی مد اچ 761 ارب روپے رکھیے ڳن۔ بجلی گیس اتے ٻے شعبیاں کیتے 1074 ارب روپے دی رقم بطور سبسݙی رکھی ڳی اے۔ آزاد کشمیر گلگت بلتستان، خیبرپختونخوا اچ ضم تھیے اضلاع، بی آئی ایس پی، ایچ ای سی، ریلویز اتے ٻے محکمیاں کیتے 1464 ارب روپے دی گرانٹ رکھی ڳی اے۔ ورکنگ جرنلسٹ ہیلتھ انشورنس کارڈ، آرٹسٹ ہیلتھ انشورنس کارڈ دا اجراء کیتا ویندا پے۔ پنشن دے مستقبل دے خرچیاں دے بقایے پورے کرݨ کیتے پنشن فنڈ دا قیام کیتا ڳے۔ انہاں آکھیا جو صوبیاں دے ترقیاتی پروگرام دا حجم 1559 روپے اے، اینویں قومی سطح تے ترقیاتی پروگرام دا حجم 2709 ارب روپے ہوسی۔ اے رقم جی ڈی پی دا صرف ݙو فیصد اے۔ مسلم لیگ ن گزریل دور حکومت اچ اینکوں پنج فیصد تئیں پڄایا ہئی۔ انہاں ݙسیا جو سرکاری شعبہ دے ترقیاتی پروگرام دے تحت 80 فیصد زیر تکمیل منصوبیاں کوں پورا کیتا ویسی۔ براہ راست غیر ملکی سرمایہ کاری کوں راغب کرݨ اتے جدید ترین انفراسٹرکچر دی فراہمی کیتے پی ایس ڈی پی دا 52 فیصد رکھیا ڳے۔ ٹرانسپورٹ اتے کمیونیکیشن کیتے 267 ارب روپے، واٹر سیکٹر کیتے 100 ارب روپے، توانائی دے شعبہ کیتے 89 ارب روپے، فزیکل پلاننگ تے ہائوسنگ کیتے 43 ارب روپے رکھیے ڳن۔ انہاں آکھیا جو موسمیاتی تبدیلی اتے قدرتی آفات دے اثرات ڳھٹ کرݨ کیتے اقدامات کیتے ویندے پن۔ سماجی شعبہ دی ترقی کیتے 244 ارب روپے رکھیے ڳن، سائنس تے آئی ٹی کیتے 34 ارب روپے رکھݨ دی تجویز اے۔ بجلی دی پیداوار، ترسیل اتے تقسیم دی بہتری کیتے 107 ارب روپے دی رقم رکھی ڳی اے۔ ملک اچ بجلی دی پیداواری صلاحیت 41 ہزار میگاواٹ تئیں پڄ ڳی اے۔ قابل تجدید توانائی دے ودھ توں ودھ استعمال دی لوڑھ اے تانجو ملکی درآمدات کوں ڳھٹ کیتا ونڄ سڳے اتے بجلی دی پیداواری لاگت ڳھٹائی ونڄے۔ ایں شعبے تے خصوصی توجہ ݙتی ڳی اے۔ جامشورو پاور پلانٹ دی تکمیل کیتے آئندے مالی سال اچ 12 ارب روپے رکھیے ڳن، پاکستان اتے تاجکستان وچال 500 کے وی ٹرانسمیشن لائن دے منصوبے کوں اڳوں ودھاوݨ کیتے 16 ارب روپے رکھیے ڳن۔ انہاں آکھیا جو مہمند ڈیم کیتے آئندے مالی سال کیتے 10 ارب 50 کروڑ روپے رکھیے ویندے پن۔ داسو ہائیڈرو پاور پراجیکٹ کیتے 59 ارب روپے، دیامر بھاشا ڈیم کیتے 20 ارب روپے نیلم جہلم ہائیڈرو پاور پراجیکٹ کیتے 4 ارب 80 کروڑ روپے رکھیے ویندے پن۔ کراچی گریٹر واٹر سپلائی سکیم کیتے 17 ارب 50 کروڑ روپے مختص کیتن، ٹرانسپورٹ اتے مواصلات کیتے 161 ارب روپے، سماجی شعبے کیتے 90 ارب روپے رکھݨ دی تجویز اے، اڄوکے مالی سال دی ٹیکس پالیسی دے بنیادی اصولاں اچ برآمدات ودھاوݨ کیتے آئی ٹی اتے ایندے متعلقہ خدمات دی حوصلہ افزائی، زرمبادلہ ودھاوݨ کیتے بیرونی ترسیلات زر دا ودھارا، اقتصادی ترقی ودھاوݨ کیتے مقامی صنعتاں دی سرپرستی، تعمیرات، ایس ایم ایز اتے زرعی شعبہ دی حوصلہ افزائی، ٹیکس دا دائرہ کار ودھاوݨ کیتے معیشت دی ڈیجیٹلائزیشن، امیر لوکاں تے ٹیکس لاوݨ، مہانگ پاروں ڳھٹ آمدن طبقے کوں سوکھ اتے نان فائلرز کیتے ٹرانزیکشن کاسٹ ودھاوݨ شامل اے۔ انہاں آکھیا جو ایں سال کوئی نواں ٹیکس نئیں لیندے پئے، کوشش اے جو عوام کوں ودھ سوکھ ݙویڄے، روزگار دے مواقع ودھاووں، کاروبار سوکھا کریڄے، صنعتاں دی ترقی، برآمدات ودھیڄے جو زرمبادلہ دے ذخائر ودھین۔ انہاں آکھیا جو انکم ٹیکس دے حوالے نال اقدامات اچ کنٹریکٹس، سپلائیز اتے سروسز تے ودہولڈنگ ٹیکس دی شرح ودھائی ویندی پئی اے، امیراں تے ٹیکس لاوݨ ترجیح اے، انہاں تے عائد سپر ٹیکس کوں پروگریسو ٹیکسیشن اچ تبدیل کرݨ کیتے ایندے ٹیکس ریٹس کوں بتدریج ودھاووݨ دی تجویز اے، لسٹڈ اتے نان لسٹڈ کمپنیاں تے 10 فیصد دی شرح نال ود ہولڈنگ ٹیکس لڳدا پئے، غیر فعال ٹیکس گزاراں ولوں 50 ہزار روپے توں ودھ نقد رقم کݙھواوݨ تے 0.6 فیصد دی شرح نال ٹیکس لایا ویندا پئے، ایں ویلھے 3 ہزار غیر ملکی شہری پاکستان دے امیر گھراں اچ مددگار دا کم کریندن، اوسطاً ہر گھریلو مددگار کوں سالانہ 6 ہزار ڈالر تئیں تنخواہ ݙتی ویندی اے، گھریلو ملازمین کوں ݙتی ونڄݨ آلی رقم تے 2 لکھ روپے سالانہ شرح نال ود ہولڈنگ ٹیکس لیندے پئے ہیں، غیر ملکی زرمبادلہ دے ذخائر اچ کمی دیاں خامیاں مکاوݨ کیتے کریڈٹ ڈیبٹ کارڈ اتے بینکنگ چینلز نال فارن کرنسی دے آئوٹ فلو دی حوصلہ شکنی کر تے فائلر تے ود ہولڈنگ ٹیکس دی موجودہ شرح 1 فیصد توں ودھا تے 5 فیصد اتے نان فائلر تے اے شرح 10 فیصد کیتی ویندی پئی اے، ٹیکسٹائل اتے لیدر دی مصنوعات دے ٹیر ون ریٹیلرز تے جی ایس ٹی دی موجودہ شرح 12 فیصد توں ودھا تے 15 فیصد کیتی ویندی پئی اے۔ وزیر خزانہ آکھیا جو صوبیاں وچال ہم آہنگی ودھاوݨ اتے پاکستان اچ ہکو سواں اتے ہم آہنگ ٹیکس نظام لاڳو کرݨ وݙی ذمہ داری اے، فاٹا اتے پاٹا دے ضم شدہ اضلاع کوں ٹیکس استثنٰ دی مدت مکݨ دے بعد ولا ہک سال دی توسیع ݙتی ویندی پئی اے، پراݨیاں استعمال شدہ 1800 سی سی تئیں دیاں ایشین میک گاݙیاں دی درآمد تے ڈیوٹیز اتے ٹیکسز دی قید توں بعد ہݨ 1300 سی سی توں اتے دیاں گاݙیاں دے ڈیوٹیز اتے ٹیکس تے کیپنگ مکائی ویندی پئی اے، گلاس مینوفیکچرنگ دے شعبہ اچ مقامی شیشے دے تحفظ کیتے مختلف اقسام دی درآمد تے 15 توں 30 فیصد تئیں ریگولیٹری ڈیوٹی لائی ویندی پئی اے، اسلام آباد اچ ڈیجیٹل پیمنٹس دی حوصلہ افزائی کرݨ کیتے ریسٹورنٹس سروس تے کریڈٹ کارڈ تے رقم ݙیوݨ تے ٹیکس دی شرح 15 فیصد توں ڳھٹا تے 5 فیصد کیتی ویندی پئی اے۔ وزیر خزانہ سرکاری ملازمین، پنشنز، فکسڈ انکم افراد کیتے ریلیف اقدامات دا ݙسایا جو حکومت کوں سرکاری ملازمین دی مشکلات دا احساس اے۔ افراط زر پاروں عام لوکاں آلی کار سرکاری ملازمین دی قوت خرید ڳھٹی اے، تہوں شدید مالی مسائل اتے وسائل دی کمی دے باوجود سرکاری ملازمین کوں ریلیف ݙتا ویندا پئے، سرکاری ملازمین دی قوت خرید بہتر ٻݨاوݨ کیتے گریڈ 1 توں 16 تئیں دے ملازمین دی تنخاہواں اچ 35 فیصد ڄݙاں جو گریڈ 17 توں 22 تئیں 30 فیصد ایڈہاک ریلیف الائونس ݙتا ویندا پئے، ڈیوٹی سٹیشن توں ٻاھرو سرکاری سفر اتے رات ٹکݨ کیتے ڈیلی الائونس اتے مائیلج الائونس 50 فیصد، ایڈیشنل چارج، کرنٹ چارج اتے ڈیپوٹیشن الائونس اچ 12 توں 18 ہزار روپے ودھایا ویندا پئے، اردلی الائونس 17500 توں ودھا تے 2500 روپے، خصوصی افراد کیتے سپیشل کنونس الائونس اچ 100 فیصد ودھارا کیتا ویند اپئے، ملٹری دے کانسٹینٹ اٹینڈ الائونس اچ 7 ہزار توں 14 ہزار، مجاز پنشنرز دا ڈرائیور الائونس 14 توں ودھا تے 21 ہزار کیتا ویندا پئے، سرکاری ملازمین دی پنشن اچ 17.5 فیصد ودھارا تھیندا پئے، سرکاری ملازمین دی ڳھٹ توں ڳھٹ پنشن 10 ہزار روپے توں ودھا تے 12 ہزار روپے کیتی ویندی پئی اے، سی ڈی این ایس دے شہداء اکائونٹ اچ ڈیپازٹ دی حد 50 لکھ توں ودھا تے 75 لکھ روپے کیتی ویندی پئی اے، بہبود سیونگ سرٹیفکیٹس اچ وی ڈیپازٹ دی حد 50 لکھ روپے توں ودھا تے 75 لکھ روپے کیتی ویندی پئی اے۔ وزیر خزانہ آکھیے جو قوم ڄاݨ چکی اے جو انہاں دا اصل خیرخواہ کون اے اتے ملکی معاشی بدحالی دا ذمہ دار کون اے، میاں شہباز شریف بطور وزیر اعلیٰ پنجاب اتے ہݨ وزیراعظم پاکستان دے منصب نال پورے خلوص نیت نال عوام دی خدمت کیتی اے، اڄوکی مخلوط حکومت 14 مہینے اچ اوکھ اتے سازشاں دے باوجود عوام دوست اقدامات کیتن اتے ملک کوں ݙیوالہ تھیوݨ توں بچا تے استحکام دی راہ تے ڳھن آئی اے، مسلم لیگ (ن) دی حکومت اڳیں وی ملک کوں بحراناں اچوں کݙھیے اتے ہݨ وی اپݨیاں اتحادی جماعتاں نال رل تے ملک کوں ترقی دی راہ تے سٹݨ کیتے ݙینھ رات ردھی ہوئی اے۔
