اسلام آباد۔11مئی(اے پی پی):وزیراعظم محمد شہباز شریف آکھیے پاکستان کوں پولیو جیہے موذی مرض توں پاک کرݨ کیتے حکومت پرعزم اے ،پاکستان دے مستقبل کوں پولیو توں پاک کرݨ تئیں ذاتی نگرانی نال آپݨیاں کوششاں جاری رکھیسی ، ۔وزیر اعظم آفس میڈیا ونگ توں جاری بیان موجب وزیرِ اعظم محمد شہباز شریف نال روٹری فاؤنڈیشن دے وفد انٹرنیشنل پولیو پلس کمیٹی دے سربراہ مائیک میک-گورن دی قیادت اچ ملاقات کیتی۔ملاقات اچ روٹری دےعہدیداران عزیز میمن، فیض کِڈوائی، عدنان روہیلہ اتے متعلقہ وزارتاں دے اعلی حکام شرکت کیتی۔وزیر اعظم آکھیے پولیو مکاوݨ کیتے روٹری انٹرنیشنل اتے بِل تے میلنڈا گیٹس فاونڈیشن دی خدمات قابلِ تحسین ہن، حکومت انسداد پولیو ورکرز دی سکیورٹی یقینی بݨیندی پئی اے ،وزیرِ اعظم 2022 دے سیلاب دے متاثرین کیتے روٹری انٹر نیشنل دی طرفوں رہائشی منصوبیں دے قیام دی پذیرائی کیتی ،وزیرِ اعظم متعلقہ حکام کوں پولیو دی آندی مہم کیتے جامع حکمتِ عملی مرتب کرݨ دی ہدایت کیتی ۔ ملاقات اچ وزیرِ اعظم کوں ݙسایا ڳیا جو روٹری انٹرنیشنل اتے انسدادِ پولیو کیتے مہم سانڳے ٻئے شراکت داراں دے اڄوکے سال 1 کروڑ 50 لکھ ڈالر مختص کیتن ۔ ملاقات اچ حکام وزیرِ اعظم کوں ملک اچ پولیو مہمات دی موجودہ صورتحال بارے آگاہ کیتے تے ݙسائےجو جنوبی خیبر پختونخوا اچ انسدادِ پولیو کیتے خصوصی مہم دا آغاز وی کیتا ویندا پئے ۔وزیرِ اعظم متعقلہ حکام خصوصاً قانون نافذ کرݨ آلے اداریں کوں ہدایت کیتی جو پولیو ورکرز دی سکیورٹی کوں ہر صورت فول پروف بݨایا ونڄے ۔ وزیرِ اعظم وزراتِ قومی صحت دے حکام کوں وی آندی انسداد پولیو مہم کیتے مکمل تیاری دی ہدایت کیتی۔
