سرینگر۔4جنوری (اے پی پی) کنٹرول لائن دے ݙوہیں پاسوں تے پوری دنیا اچ رہݨ آلے کشمیری 5جنوری کوں یوم حق خود ارادیت منیسن، کشمیری ایں ݙینھ آپݨی جدوجہد آزادی کوں ایندے منطقی انجام تئیں جاری رکھݨ دے عزم دی تجدید کریسن ۔کشمیر میڈیا سروس موجب اے ݙینھ مناوݨ دی اپیل کل جماعتی حریت کانفرنس کیتی اے۔ جموں و کشمیر، آزاد کشمیر، پاکستان اتے دنیا دے سارے وݙے دارالحکومتاں اچ احتجاجی مظاہرے، ریلیاں، سیمینار اتے ٻئے پروگرام منعقد کیتے ویسن تاں جو اقوام متحدہ کوں یاد ݙیوایا ونڄ سڳے جو او کشمیر دے جھیڑے کوں حل کرݨ کیتے آپݨی قرارداداں تے عملدرآمد کراوے اتے کشمیریاں کوں بھارتی جبرتوں نجات ݙیواوے ۔ اقوام متحدہ دی سلامتی کونسل 5جنوری 1949کوں ھک قرارداد منظور کیتی ہئی جیں اچ اقوام متحدہ دی زیر نگرانی رائے شماری دے ذریعے کشمیریاں کوں آپݨے مستقبل دافیصلہ خود کرݨ دا موقع ݙیوݨ دے حق کوں منیا ڳیا ہئی ۔ حل تھیوݨ آلا جھیڑا کشمیر پاکستان تے بھارت وچال ھک نیوکلیئر فلیش پوائنٹ بݨ چکیے جیڑھا جو پورے خطے کوں آپݨی وکیڑ اچ گھن سڳدے ۔5جنوری 1949کوں منظور کیتی ڳئی قرارداد جھیڑا کشمیر دے حل دی بنیاد ݙیندی اے تاں جو بھارت دی روایتی ہٹ دھرمی تے مبنی رویہ مسئلہ کشمیر دے حل اچ ساریں توں ݙی رکاوٹ اے ۔
